Янгиликлар

24.04.2025

Maktabimizga O'zbekiston Respublikasi fanlar akademiyasi akademiklari:

- fizika-matematika fanlari doktori, professor - G'ulomov Qodir G'ofurovich;

- O'zbekiston Respublikasi fan arbobi - Axmedov Bobomurod Jo'rayevich;

- fizika-matematika fanlari doktori, professor - Abdujabborov Ahmadjon Adilanovich;

- Namangan davlat unversiteti Fizika kafedirasi mudiri fizika-matematika fanlari doktori, professor-Abdulazizov Baxrom Toshmirza o'g'li tashrif buyurdi.

Tashrif chog'ida akademik olimlar o'z faoliyati, mashaqqatli yo'llar, erishgan yutuqlari hamda ilmning davlat rivoji va taraqqiyotida nechog'lik muhim ahamiyat kasb etishi haqida gapirib o'tdi.

Bunday uchrashuvlardan maqsad-ertamiz egalarida akademiklar ta'limidan ruhlanib, har tomonlama barkamol avlod bo'lib yetishishiga umid va ishonch tuyg'ularini shakllantirish.

https://t.me/norin_tuman_hokimligi/83947

24.04.2025

Умумтаълим мактабларида ўқув йили тугаб, болажонлар ёзги каникулга чиқадилар. Уларнинг ёзги ҳордиқ олишларини мазмунли ташкил этиш доимо эътиборда.

Туманимизда Ўзбекистон Республикаси Вазирлар Маҳкамасининг  «Болаларнинг дам олишини ташкил этиш ва соғломлаштириш тизимини янада такомиллаштириш чора-тадбирлари тўғрисида»ги қарори ижросини таъминлаш мақсадида ёзги мавсумда “Норин” болалар оромгоҳи тўрт сменада ташкил этилиб,  дам олувчи болажонларни  ўз бағрига олади.

Туман ҳокими Жўрабек Нурматов оромгоҳда ёзги мавсумга тайёргарлик ишлари билан танишди ва зудлик билан соҳага дахлдор раҳбарларга ҳудудни ободонлаштириш, дам олувчиларга қулай шарт-шароитлар яратиш тўғрисида кўрсатмалар берди.

Норин тумани ҳокимлиги Ахборот хизмати.

https://t.me/norin_tuman_hokimligi/83956

25.03.2025

Aholini ro‘yxatga olish, avvalo, davlat yoki hukumat emas, balki jamiyatning o‘zi uchun zarur bo‘lib, u vaqti-vaqti bilan o‘z-o‘zini ko‘zguda ko‘rish orqali rivojlanish natijalarini baholash imkoniyatidir. Ro‘yxatga olishda qatnashayotgan har bir fuqaro o‘zi haqidagi ma’lumotlarni taqdim eta turib, o‘zlari mansub bo‘lgan kishilar guruhiga tegishli ijtimoiy dasturlarni ishlab chiqishda ishtirok etadi.

Misol uchun, ishsizlarning so‘rovnomadagi javoblari mehnat bozorini o‘rganish va aynan kerakli joyda yangi ish o‘rinlari yaratish imkonini bersa,  bolalar soni to‘g‘risidagi ma’lumotlar maktab, maktabgacha ta’lim muassasalari va shu kabi muassasalar qurilishi rejalarini tuzishda qo‘l keladi. Yosh haqidagi ma’lumotlar pensiyaga chiqadiganlar soni, ularning pensiya to‘lovlari uchun zarur bo‘ladigan mablag‘larni jamg‘arib borish imkonini beradi. Har yili maktabgacha ta’lim, umumta’lim maktablari yoki oliy ta’limga qabul qilinadigan yoshlar to‘g‘risidagi ma’lumotlar ham xuddi shunday shakllanadi. Yashash joyi to‘g‘risidagi ma’lumotlar esa har birimizning uyimizgacha keladigan yo‘llar qurilishi, kommunikatsiyalar bilan ta’minlashni rejalashtirish uchun zarur.

24.03.2025

Яқинда, 2025 йил 5 март куни Президент Шавкат Мирзиёев раислигида Коррупцияга қарши курашиш бўйича Миллий кенгаш йиғилиши бўлиб ўтди. Унда олиб борилган ишлар таҳлил қилиниб, бу борадаги кейинги вазифалар белгилаб олинди.

Йиғилишда Президент коррупция ислоҳотлар йўлидаги жиддий тўсиқ эканини таъкидлаб, коррупцияга олиб келадиган омилларни бартараф этишга қаратилган профилактик чора-тадбирларни кучайтириш зарурлигини қайд этди. Коррупцияга қарши курашиш агентлигининг иш усулини ўзгартириш ва унинг коррупциявий ҳолатларнинг олдини олишдаги ролини кучайтириш бўйича қарор қабул қилинди.

Бундан ташқари, давлат органларида ошкоралик ва ҳисобдорликни ошириш, шунингдек, давлат хизматчилари даромадларини декларация қилиш тизимини жорий этиш масалалари муҳокама қилинди. Ушбу чора-тадбирлар фуқароларнинг суд тизими ва давлат институтларига бўлган ишончини мустаҳкамлашга қаратилган.

Президент раҳбарлигида ўтказилган мазкур йиғилиш Ўзбекистоннинг коррупцияга қарши курашиш ва суд тизимида адолатни таъминлаш борасидаги изчил давлат сиёсатини амалга оширишга содиқлигини тасдиқлайди.

Таъкидлаш жоизки, Ўзбекистон коррупцияга қарши курашиш тизимини босқичма-босқич мустаҳкамлаб, халқаро ташаббусларга қўшилиб, миллий механизмларни такомиллаштириб бормоқда. Бу йўналишдаги илк муҳим қадам мамлакатнинг халқаро муҳим битимларга қўшилиши бўлди: Трансмиллий уюшган жиноятчиликка қарши курашиш бўйича БМТ конвенцияси (2000 й.) ва БМТнинг Коррупцияга қарши курашиш конвенцияси (2003 й.). Ушбу ҳужжатлар коррупциявий ҳолатларнинг олдини олиш ва бу соҳадаги ҳуқуқий тартибга солишни кучайтиришга қаратилган комплекс чора-тадбирларни ишлаб чиқиш учун мустаҳкам асос бўлиб хизмат қилди.

Бу йўлдаги яна бир муҳим босқич – 2010 йилда Ўзбекистоннинг Иқтисодий ҳамкорлик ва тараққиёт ташкилотининг (ОЭСР) Коррупцияга қарши курашиш бўйича Истанбул ҳаракатлар режасига қўшилиши бўлди. Ушбу механизмда иштирок этиш мамлакатга коррупцияга қарши ислоҳотларни мониторинг қилишнинг халқаро тизимига интеграциялаш имконини берди, шунингдек, мустақил баҳолашнинг беш босқичидан ўтиш орқали муаммоли жиҳатларни аниқлаш ва илғор тажрибаларни жорий этиш имкониятини яратди.

2017 йилда қабул қилинган “Коррупцияга қарши кураш тўғрисида“ ги қонун коррупцияга қарши сиёсатга янги суръат бахш этди. Ушбу норматив-ҳуқуқий ҳужжат коррупцияга қарши курашишнинг ҳуқуқий ва ташкилий асосларини белгилаб берувчи фундаментал ҳужжатга айланди. Қонун доирасида Республикалараро идоралараро комиссия ташкил этилди ва кейинчалик у Коррупцияга қарши курашиш бўйича Миллий кенгашга айлантирилди. Ушбу орган фақат давлат идоралари вакилларини эмас, балки фуқаролик жамияти, илмий доиралар ва бошқа мустақил тузилмалар экспертларини ҳам бирлаштирди. Бундай кўп секторли ёндашув жамоатчилик назорати механизмларини кенгайтириш, давлат органлари фаолиятининг шаффофлигини ошириш ва халқаро ташкилотлар билан ҳамкорликни мустаҳкамлаш имконини берди.

Бугунги кунда Ўзбекистон коррупцияга қарши стратегияни янада ривожлантириб, жараёнларни рақамлаштириш, қонунчиликни такомиллаштириш ва фуқаролик назорати механизмларини кучайтиришга алоҳида эътибор қаратмоқда. Ушбу чора-тадбирлар самарали, шаффоф ва ҳисобдор бошқарув тизимини яратишга қаратилган бўлиб, жаҳон стандартларига мос келади.

Коррупцияга қарши чора-тадбирлар орасида коррупцион жиноятларни аниқлаш ва бартараф этиш бўйича ихтисослашган тузилмаларни ташкил этиш муҳим ўрин тутади. Жумладан, Бош прокуратура, Давлат хавфсизлик хизмати, Ички ишлар вазирлиги, Адлия вазирлиги ва бошқа ваколатли органларнинг роли кучайтирилди. 2021 йилда Парламентда коррупцияга қарши курашиш ва суд-ҳуқуқ масалалари бўйича қўмиталар тузилди, бу эса парламент назоратини кучайтириш имконини берди.

Суд тизимидаги коррупция ҳуқуқ-тартибот соҳасидаги энг мураккаб ва нозик муаммолардан бири ҳисобланади. Жамиятнинг суд тизимига бўлган ишончи қабул қилинган қарорларнинг адолатлилиги, асослилиги ва холислигига боғлиқ. Ўзбекистонда суд фаолиятига замонавий ахборот-коммуникация технологияларини жорий этиш бўйича чоралар кўрилди, бу эса қарор қабул қилишда инсон омилини минималлаштиришга хизмат қилмоқда. Хусусан, 2021 йилдан бошлаб ишлар судьялар ўртасида автоматик тарзда тақсимланадиган тизим жорий этилди, бу эса айрим судьяларга таъсир ўтказиш орқали коррупцияга йўл қўйиш имкониятини йўққа чиқаради.

Шунингдек, суд тизимида кадр сиёсати бўйича кенг кўламли ислоҳотлар бошланди. Судья лавозимига номзодларга қўйиладиган янги талаблар жорий этилди, жумладан, мажбурий психологик тест синовлари талаб қилинмоқда. Жаҳон тажрибаси шуни кўрсатадики, бундай ёндашув кадрларни танлаш босқичида коррупция хавфларини аниқлаш имконини беради. Германия, Португалия, Австрия ва бошқа мамлакатларда номзодлар стрессга чидамлилик ва этикага риоя қилиш қобилияти бўйича синовлардан ўтишлари керак. Қозоғистон ва Молдова каби давлатларда эса номзодлар полиграф текширувидан ўтиши мумкин.

Ўзбекистоннинг коррупцияга қарши миллий стратегияси суд-ҳуқуқ тизимидан ташқаридаги бошқа давлат институтлари, иқтисодиёт ва жамият ҳаётини қамраб олган кенг қамровли ислоҳотларга йўналтирилмоқда. 2025 йил 5 март куни бўлиб ўтган Коррупцияга қарши курашиш бўйича Миллий кенгаш йиғилишида Президент Шавкат Мирзиёев коррупцияга қарши курашишни давлат сиёсатининг ажралмас қисми сифатида белгилаб, 55 та ташаббусни илгари сурди.

Жумладан, коррупцияга қарши курашиш бўйича халқаро ташкилотлар ва шериклар билан ҳамкорликни кучайтириш, GRECO ва БМТ тавсияларига мос қонунчиликни ишлаб чиқиш, коррупцион жиноятларни мустақил текшириш механизмларини яратиш ва коррупцияни фош этувчиларни ҳимоя қилиш тизимини ривожлантириш каби йўналишларга алоҳида эътибор қаратилди.

Шунингдек, давлат хизматлари, соғлиқни сақлаш, таълим, ҳуқуқ-тартибот органлари ва давлат компаниялари коррупцияга қарши қаттиқ назоратга олинади. Бюджет харажатларини мониторинг қилиш, электрон тендерлар ва шартномаларни жорий этиш, инфратузилма лойиҳаларини аудит қилиш орқали шаффофликни таъминлаш режалаштирилган.

Президент томонидан таклиф қилинган чора-тадбирлар шаффоф ва ҳисобдор давлат бошқарувини яратишга, фуқароларнинг давлатга бўлган ишончини мустаҳкамлашга ва Ўзбекистоннинг инвестициявий жозибадорлигини оширишга хизмат қилади.

Наманган туманлараро иқтисодий суди судьяси Мадрахимов Бекзод

24.03.2025

Vazirlar Mahkamasining 21.02.2025 yildagi «Jabrlanuvchilarni, guvohlarni va jinoyat protsessining boshqa ishtirokchilarini ijtimoiy himoya qilishni ta’minlash tartibi toʻgʻrisidagi nizomni tasdiqlash haqida»gi 103-son qarori qabul qilindi.

Nizom himoya qilinuvchi shaхslarga bir martalik nafaqa tayinlash va toʻlash tartibini belgilaydi.

Himoyalanadigan shaхslar quyidagilardir:

• jabrlanuvchi va uning qonuniy vakili;
• guvoh;
• jamoat ayblovchisi va jamoat himoyachisi;
• gumon qilinuvchi, ayblanuvchi, sudlanuvchi, ularning himoyachilari va qonuniy vakillari;
• mahkum, oqlangan shaхs, shuningdek oʻziga nisbatan jinoyat ishi tugatilgan shaхs;
• fuqaroviy da’vogar, fuqaroviy javobgar va ularning vakillari;
• ekspert, mutaхassis, tarjimon va хolis;
• yuqorida koʻrsatilgan shaхslarning oila a’zolari va yaqin qarindoshlari.

Shaхsni ijtimoiy himoya qilish choralarini qoʻllash uchun asoslar:

• himoya qilinuvchi shaхsning jinoyat protsessida ishtirok etishi munosabati bilan halok boʻlishi (vafot etishi);
• jinoyat protsessida ishtirok etishi munosabati bilan nogironlikka sabab boʻlgan tan jarohati yoki uning sogʻligʻiga boshqacha tarzda shikast yetkazilganda;
• jinoyat protsessida ishtirok etishi munosabati bilan nogironlikka olib kelmaydigan tan jarohati yoki uning sogʻligʻiga boshqacha tarzda shikast yetkazish;
• jinoyat protsessida ishtirok etishi munosabati bilan mulkiy zarar yetkazilganda.

Himoya qilinuvchi shaхs jinoyat protsessida ishtirok etishi munosabati bilan halok boʻlgan (vafot etgan) taqdirda, uning oila a’zolariga bir yoʻla toʻlanadigan nafaqa miqdori BHMning 100 baravarini tashkil etadi (teng ulushlarda taqsimlanadi).

Himoya qilinuvchi shaхsga uning jinoyat protsessida ishtirok etishi munosabati bilan nogironlikka sabab boʻlgan tan jarohati yoki uning sogʻligʻiga boshqacha tarzda shikast yetkazilgan taqdirda, nogironlik guruhiga qarab:

• I guruhga –  BHMning 80 baravari;
• II guruhga –  BHMning 70  baravari;
• III guruhga –  BHMning 50 baravari miqdorida nafaqa toʻlanadi.

Nogironlikka olib kelmagan tan jarohati yetkazilgan taqdirda, uning ogʻirligiga qarab quyidagi toʻlovlar tayinlanadi:

• ogʻir tan jarohati olganda – BHMning 35 baravari;
• oʻrtacha ogʻirlikdagi tan jarohati olganda – BHMning 30 baravari;
• salomatlikning qisqa muddatli yomonlashuviga olib kelgan yengil darajadagi tan jarohati olganda –  BHMning 25 baravari miqdorida nafaqa toʻlanadi.