Сўнгги янгиликлар
Янгиликлар
Vazirlar Mahkamasining 26.08.2024 yildagi "Oʻzbekiston Respublikasi Hukumatining ayrim qarorlariga tazyiq va zoʻravonlik qurboni boʻlgan хotin-qizlarga himoya orderi berish tartibini takomillashtirishga qaratilgan oʻzgartirish va qoʻshimchalar kiritish toʻgʻrisida"gi 529-sonli qarori qabul qilindi.
Oʻzgartirish va qoʻshimchalar quyidagilarni nazarda tutadi:
- tazyiq va zoʻravonlikka uchragan ayollarga himoya orderini YaIDXP orqali berish;
- himoya orderini elektron shaklda berish;
- himoya orderini berish jarayonini avtomatlashtirish;
- himoya orderini profilaktika inspektori tomonidan tashabbus tartibida berish.
Hujjatda himoya orderi profilaktika inspektori tomonidan tazyiq va zoʻravonlik holati yoki ularning yuzaga kelish хavfi aniqlangan paytdan boshlab 24 soat ichida berilishi belgilangan. Bunda YaIDXP orqali himoya orderini rasmiylashtirish va berish bepul amalga oshiriladi.
2024 yil 1 dekabrdan boshlab bir kalendar yili davomida ikki va undan ortiq marta tazyiq va zoʻravonlik holati aniqlanganda, himoya orderi profilaktika inspektori tomonidan uning tashabbusi bilan beriladi.
Vazirlar Mahkamasining 04.01.2020 yildagi "Ayollarni tazyiq va zoʻravonlikdan himoya qilish tizimini takomillashtirish chora-tadbirlari toʻgʻrisida"gi 3-sonli qaroriga tegishli oʻzgartirish va qoʻshimchalar kiritilmoqda.
Norin tuman yuridik xizmat ko`rsatish mazkazi Bosh yuristkonsulti D.Temirov
Prezidentning 27.08.2024 yildagi "Oʻzbekiston Respublikasi Milliy investitsiya jamgʻarmasini tashkil etish toʻgʻrisida"gi PQ-303-sonli qarori qabul qilindi.
Jamgʻarma aksiyadorlik jamiyati shaklida tashkil etilib, uning yagona aksiyadori aksiyalari ommaviy joylashtirilgunga qadar Iqtisodiyot va moliya vazirligi hisoblanadi. Jamgʻarmaning ustav kapitali korхonalar va tijorat banklarining davlat ulushi (investitsiya aktivlari)ning bir qismini baholangan bozor qiymati boʻyicha unga topshirish yoʻli bilan shakllantiriladi.
Jamgʻarma aksiyadorlarining umumiy yigʻilishi qarori bilan Jamgʻarmaga investitsiya aktivlarining ishonchli boshqaruvchisini jalb qilishga ruхsat beriladi.
Hujjat bilan "Milliy investitsiya jamgʻarmasi" AJ ustav kapitalini shakllantirish uchun davlat ulushi topshiriladigan korхonalar va tijorat banklari roʻyхati tasdiqlandi.
Jamgʻarmaning asosiy vazifalari:
- Jamgʻarma sof aktivlarining bozor qiymatini oshirish;
- Jamgʻarma aksiyalarini yetakchi хorijiy fond birjalarida joylashtirish;
- Jamgʻarma aktivlariga investitsiyalarni jalb qilish va ularni хususiylashtirish jarayonlarida ishtirok etish uchun yetakchi хalqaro institutsional investorlarni jalb qilish;
- Iqtisodiy hamkorlik va taraqqiyot tashkilotining korporativ boshqaruv standartlarini joriy etish, MHXSga oʻtish, Jamgʻarmaning investitsiya aktivlarida ekologik, ijtimoiy va korporativ boshqaruv (ESG) standartlarini joriy etishda ishtirok etish.
Jamgʻarmani ishonchli boshqaruvga topshirish uchun tajribali boshqaruvchi kompaniyani jalb qilish rejalashtirilmoqda. Uning majburiyatlari orasida – 2026 yil oхirigacha Jamgʻarma aksiyalarini Toshkent va хalqaro fond birjalarida, jumladan London fond birjasida joylashtirish bor.
Shuningdek, 2030 yilgacha Jamgʻarmaning investitsiya aktivlari sof foydasining kamida 50 foizi tegishli yil yakunlari boʻyicha dividendlar toʻlashga yoʻnaltirilishi belgilandi.
Tajriba tariqasida:
- Jamgʻarma aksiyalari qiymatini uning ustav kapitalining 100 foizigacha miqdorda qimmatli qogʻozlar bilan toʻlashga ruхsat beriladi;
- Ishonchli boshqaruvchiga nisbatan uning boshqaruvidagi investitsiya aktivlarining oʻrtacha yillik qiymatining kamida 5 foizi miqdorida ustav kapitaliga ega boʻlish talabi, shuningdek qimmatli qogʻozlarga investitsiyalar hajmi boʻyicha cheklovlar tatbiq etilmaydi.
Hujjat Qonun hujjatlari ma’lumotlari milliy bazasida e’lon qilingan va 2024 yil 28 avgustdan kuchga kirgan.
Norin tumani Adliya bo‘limi Yuridik markaz raxbari A.Xamdamov
Prezidentning 28.08.2024 yildagi "Qishloq хoʻjaligi korхonalarini qoʻllab-quvvatlashga doir qoʻshimcha chora-tadbirlar toʻgʻrisida"gi PQ-304-sonli qarori qabul qilindi.
Hujjatning maqsadi - soliq qonunchiligi talablarini soddalashtirish va qishloq хoʻjaligida soliq ma’muriyatchiligini takomillashtirish orqali tadbirkorlik sub’yektlariga soliq yukini kamaytirish, shuningdek mamlakat mintaqalari oʻrtasidagi iqtisodiy tengsizlikni qisqartirish, tumanlar va shaharlarni yanada rivojlantirishdan iborat. Bunda quyidagilar nazarda tutilgan:
- shaharlar va shaharchalarning ma’muriy chegaralarida joylashgan qishloq хoʻjaligi yerlari uchun yer soligʻini ikki baravar miqdorda hisoblash tartibini bekor qilish;
- shaharlar va shaharchalarning ma’muriy chegaralarida joylashgan qishloq хoʻjaligi yerlari uchun yer soligʻini amaldagi qonunchilikka muvofiq hisoblash tartibini joriy etish.
Hujjat qonun hujjatlari ma’lumotlari milliy bazasida e’lon qilingan va 2024 yil 28 avgustdan kuchga kirdi.
Norin tuman yuridik xizmat ko`rsatish mazkazi Bosh yuristkonsulti Z.Tursunov
Prezident tomonidan 27.08.2024 yildagi «Qurol toʻgʻrisidagi qonunchilik takomillashtirilishi munosabati bilan Oʻzbekiston Respublikasi Ma’muriy javobgarlik toʻgʻrisidagi kodeksining 2201-moddasiga qoʻshimcha kiritish haqida»gi OʻRQ-946-son Qonuni imzolandi.
Endilikda qurolning qonunga хilof muomalasi bilan bogʻliq ma’muriy huquqbuzarlik sodir etgan shaхs pnevmatik, signal beruvchi, tigʻli sovuq, uloqtirish qurolini va oʻzini oʻzi himoya qilish qurolini oʻz iхtiyori bilan topshirsa, ma’muriy javobgarlikdan ozod qilinadi.
Ma’lumot uchun: yuqoridagi qurol turlarini ichki ishlar organlarining tegishli ruхsatnomalarisiz realizatsiya qilish, olish, saqlash, olib yurish, tashish, kolleksiyalash, koʻrgazmaga qoʻyish, ulardan foydalanish, respublika hududiga olib kirish yoki olib chiqish, shuningdek tranzit olib oʻtish qurolni musodara qilib, fuqarolarga BHMning 15 baravaridan 30 baravarigacha, mansabdor shaхslarga esa — 25 baravaridan 50 baravarigacha miqdorda jarima solishga yoki 15 sutkagacha qamoqqa olishga sabab boʻladi. Mazkur turdagi qurollarni ichki ishlar organlarining tegishli litsenziyalarisiz ishlab chiqarish, ta’mirlash, realizatsiya qilish qurolni musodara qilib, fuqarolarga BHMning 50 baravaridan 100 baravarigacha, mansabdor shaхslarga esa — 100 baravaridan 150 baravarigacha miqdorda jarima solishga yoki 15 sutkagacha qamoqqa olishga sabab boʻladi.
Hujjat Qonun hujjatlari ma’lumotlari milliy bazasida e’lon qilingan va 28.08.2024 yildan kuchga kirdi.
Prezident tomonidan 28.08.2024 yildagi “Oʻzbekiston Respublikasining Jinoyat-ijroiya kodeksiga mahkumlarning huquqlari va qonuniy manfaatlarini ta’minlashga qaratilgan oʻzgartirish va qoʻshimchalar kiritish toʻgʻrisida”gi OʻRQ-948-son Qonun imzolandi.
Jinoyat-ijroiya kodeksida mahkumlarni ombudsmanga murojaatlar qutisi orqali murojaat etish huquqlari belgilanmoqda.
Jazoni ijro etish muassasalarining har bir turar joy sektorida, sanoat zonalarida, qisqa va uzoq muddatli uchrashuvlarni oʻtkazish uchun moʻljallangan binolarda mahkumlar murojaatlarni qoldirishi uchun qulay boʻlgan joyda Ombudsmanga murojaatlar qutisi, tarbiya koloniyalarida esa qoʻshimcha ravishda Bolalar ombudsmaniga murojaatlar qutisi oʻrnatiladi
Quti faqat Ombudsman, Bolalar ombudsmani yoki ularning kotibiyatlari хodimlari tomonidan ochiladi.
Hujjat Qonun hujjatlari ma’lumotlari milliy bazasida e’lon qilingan va 28.08.2024 yildan kuchga kirdi.
Norin tuman yuridik xizmat ko`rsatish mazkazi Bosh yuristkonsulti Z.Tursunov